फुटबल स्टार ज्लाटन इब्राहिमोभिच भन्छन्– ‘को विराट कोहली ? म उनलाई चिन्दिन’

अर्थ चौतारी

२०८१ असार २६, बुधबार

फुटबल स्टार ज्लाटन इब्राहिमोभिच भन्छन्– ‘को विराट कोहली ? ...

A A- A+

काठमाडौँ । ड्यारेन जासन वाट्किन्स जुनियर अमेरिकाका सोशल मिडिया स्टार हुन् । उनी सामाजिक सञ्जालमा ‘आइशो स्पिड’ को नामले चर्चित छन् । उनी चर्चित भारतीय क्रिकेटर विराट कोहलीका प्रशंसक पनि हुन् ।उनी सामाजिक सञ्जालमा प्रायः कोहलीको प्रशंसा गरिरहन्छन् । हालै उनी स्विडेनका चर्चित फुटबल खेलाडी ज्लाटन इब्राहिमोभिचसँग एक यात्रामा निस्किएका थिए । सोही यात्राका क्रममा आइशो स्पिडले इब्राहिमोभिचलाई पनि विराट कोहलीको विषयमा प्रश्न गर्छन् ।

आइशो स्पिडको प्रश्न सुनेर इब्राहिमोभिच रनभुल्लमा पर्छन् । भिडियोमा इब्राहिमोभिचले अचम्मको प्रतिक्रिया जनाउँछन् । पहिले आइशो स्पिडले इब्राहिमोभिचलाई प्रश्न गर्छन्, ‘के तपाईँ विराट कोहलीलाई चिन्नुहुन्छ ?’

प्रश्न सुनेर इब्राहिमोभिच सुरुमा अकमक्क पर्छन् । त्यसपछि उनले आइशो स्पिडलाई प्रश्नकै शैलीमा जवाफी दिन्छन्– ‘को विराट कोहली ? विराट कोहली त परको कुरा, मैले त आजसम्म क्रिकेट खेल पनि हेरेको छैन । कसैको अपमान गर्ने मेरो चाहना होइन । तर, वास्तवमै म कोहलीलाई चिन्दिन । यसका लागि म क्षमाप्रार्थी पनि छु ।’

इब्राहिमोभिचको जवाफ सुनेपछि आइशो स्पिडले उनलाई कोहली र क्रिकेट बारेमा बताउँछन् । कोहलीको प्रशंसा गर्दै आइशो स्पिड भन्छन्, ‘विराट क्रिकेटका महान् खेलाडी हुन् । म नियमित रूपमा उनको खेल हेर्छु ।’

आइशो स्पिडले यस्तै प्रश्न आफ्नो समयका प्रभावशाली ब्राजिलियन फुटबलर रोनाल्डो नजारियोलाई पनि गरेका थिए । तर, रोनाल्डोले भने विराटको बारेमा आफू जानकार रहेको जवाफ दिएका थिए । आइशो स्पिडले रोनाल्डोलाई विराटको तस्बिर देखाएर प्रश्न गरेका थिए, ‘तपाईँ उहाँलाई चिन्नहुन्छ ? त्यसको जवाफमा रोनाल्डो नजारियोले विराट चर्चित खेलाडी भएको बताएका थिए ।’