उजुरीबिनै गृहमन्त्रीको राजीनामा माग्नु र सदन अवरुद्ध गर्नु लोकतन्त्रप्रति गैरजिम्मेवार रवैया हो : प्रधानमन्त्री ओली

अर्थ चौतारी

२०८२ जेष्ठ १९, सोमबार

उजुरीबिनै गृहमन्त्रीको राजीनामा माग्नु र सदन अवरुद्ध गर्नु लोकतन्त्रप्रति ...

A A- A+

काठमाडौँ। गृहमन्त्री रमेश लेखकको राजीनामालाई अनावश्यक विषय बनाएर प्रतिपक्षले सदन अवरोध गर्नु लोकतन्त्रविपरीत भएको प्रधानमन्त्री एवं नेकपा (एमाले)का अध्यक्ष केपी शर्मा ओलीले बताएका छन् ।

एमाले संसदीय दलको आज बानेश्वरमा बसेको बैठकलाई सम्बोधन गर्दै प्रधानमन्त्री ओलीले मङ्गलबारदेखि संसद्का नियमित गतिविधि सञ्चालन हुने बताए ।

'मङ्गलबारदेखि नियमित संसद चलाऊँ भनेर मैले प्रमुख प्रतिपक्षी नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’सँग कुरा गर्न खोजेको छु, उहाँ सम्पर्कमा आउनुभएन । वार्ता, संवाद नगर्ने अनि सदन बन्द गर्ने मुडमा उहाँहरू हुनुहुन्छ होला । यस्तो व्यवहार सधैं चल्दैन । संसद् सधैं बन्द हुँदैन,' प्रधानमन्त्री ओलीले भने, 'केही विषय नपाएर गृहमन्त्रीको राजीनामा मागिएको छ, जबकि गृहमन्त्रीमाथि कुनै उजुरी वा छानबिन चलेको छैन । त्यसकारण यस्ता कुरामा संसद् अवरुद्ध हुँदैन । भोलिदेखि सदन चल्छ ।'

सडकमा कुनै समूहले केही माग लिएर बस्दा दौडिएर समर्थन गर्ने, सदन पनि अवरोध गर्ने, यस्ता कामले प्रतिगमनलाई सहयोग पुग्ने तथा लोकतन्त्रलाई असहयोग हुने प्रधानमन्त्री ओलीको भनाइ थियो ।