काठमाडौं– नेपाली संगीत क्षेत्रमा लामो समयदेखि सक्रिय गायक तथा संगीतकार डीबी खड्काले नयाँ कार्यक्रमको सुरुवात गरेका छन्। मातातीर्थ औँसी अर्थात आमाको मुख हेर्ने दिनको विशेष अवसर पारेर उनले ‘सेल्फ टक’ नामक कार्यक्रम सार्वजनिक गरेका हुन्। सामाजिक सञ्जाल तथा युट्युबमार्फत सञ्चालनमा ल्याइएको यो कार्यक्रम रियासा इन्टरटेनमेन्टको प्रस्तुति हो।
डीबी खड्काको अनुसार, ‘सेल्फ टक’ केवल मनोरञ्जनमूलक मात्र नभएर सामाजिक, पारिवारिक तथा व्यक्तिगत प्रेरणाका स्रोत बन्ने उद्देश्यले ल्याइएको कार्यक्रम हो। मातातीर्थ औँसीको दिन आमाप्रति श्रद्धाञ्जली दिँदै कार्यक्रमको प्रारम्भ गर्नुको पछाडि विशेष अर्थ रहेको उनले बताए।
उनले भने, “यो कार्यक्रम मेरो जीवनको आत्मदर्शन हो, जसको पहिलो भाग मैले आफ्नी आमाप्रति समर्पणस्वरूप प्रस्तुत गरेको छु। मैले मेरो जीवनमा आमाले दिएको प्रेरणा, माया र साथका पलहरू साझा गर्दै यो यात्रा सुरु गरेको हुँ।”
कार्यक्रमको पहिलो भागमा डीबी खड्काले आफ्नी आमासँग जोडिएका बाल्यकालका स्मृतिहरू, संघर्षका दिनहरू, सफलता र असफलताका मोडहरू, अनि आमाबाट पाएको शिक्षाको बारेमा गहिरो भावनात्मक कुराकानी गरेका छन्। आत्मदर्शन, आत्ममूल्यांकन र प्रेरणाको मिश्रण रहेको यस कार्यक्रमले दर्शकलाई आफ्नै जीवनप्रति पुनर्विचार गर्न प्रेरणा दिनेछ भन्ने विश्वास गरिएको छ।
‘सेल्फ टक’ श्रृंखलामा विभिन्न तहमा योगदान दिएका व्यक्तित्वहरूलाई समेत समेटिने डीबी खड्काले जानकारी दिए। कलाकार, समाजसेवी, शिक्षाविद्, उद्यमी, युवा प्रेरक व्यक्तित्वहरू लगायत विभिन्न पृष्ठभूमिका मानिसहरूको जीवनकथा, संघर्ष र सफलताको कथा दर्शक समक्ष प्रस्तुत गरिनेछ।
रियासा इन्टरटेनमेन्टमार्फत यो कार्यक्रम नियमित रूपमा युट्युबमा प्रशारण गरिनेछ। कार्यक्रमको उत्पादन, सम्पादन र प्रस्तुतिकरण सबै काममा डीबी खड्काले व्यक्तिगत रूपमा संलग्न भएर काम गरिरहेका छन्, जसले कार्यक्रमलाई झनै व्यक्तिगत र आत्मीय बनाएको छ।
उनले भने, “म चाहन्छु, प्रत्येक व्यक्तिले आफूभित्र झाँक्ने मौका पाओस्। सेल्फ टक एउटा सन्देश हो – हरेक व्यक्ति विशेष छ, र उसले आफ्नो अनुभव अरूसँग बाँड्न सक्छ जसले समाजमा सकारात्मक प्रभाव पार्न सक्छ।”
यस किसिमका आत्मदर्शी कार्यक्रमहरू नेपाली डिजिटल प्लेटफर्ममा कम पाइन्छन्। यिनले न केवल मनोरञ्जन दिन्छन्, बरु व्यक्तिको मानसिक स्वास्थ्य, सामाजिक सोच र आत्म-उत्थानमा समेत योगदान पुर्याउने अपेक्षा गरिएको छ।
डीबी खड्काले यसअघि थुप्रै लोक तथा आधुनिक गीतमार्फत नेपाली संगीतमा आफ्नो पहिचान बनाइसकेका छन्। अब, संगीतबाट बाहिर नहटी, उनले आफ्नो कलालाई दृश्य माध्यमतर्फ पनि विस्तार गरेका छन्।
‘सेल्फ टक’ को आगामी भागहरूमा विभिन्न चर्चित व्यक्तित्वहरूको जीवन यात्रा र अनुभव प्रस्तुत गरिँदै जानेछ। हरेक एपिसोडमा एउटा नयाँ सन्देश, नयाँ दृष्टिकोण र नयाँ प्रेरणा हुनेछ। डीबी खड्का भन्छन्, “जीवन केवल बाह्य यात्रामा होइन, भित्री यात्रामा पनि हो। र यही यात्रा हो ‘सेल्फ टक’।”
इन्टरनेटमा के गरौं गरौं हुन्छ
टेलिकमको फाइबर इन्टरनेट जोड्ने ग्राहकलाई
क्यासिनो एपमार्फत नेपालीलाई सट्टेबाजीमा लगाउने
मोबाइल एपमार्फत १ घण्टामै श्रम
आठ महिनामा नेपाल भित्रिए ७८
खेलकुद मन्त्री र आइसिसी अध्यक्षबीच