ऋणको आडमा बलात्कार गर्ने माली मानव बेचबिखनमा दोषी ठहर, १० वर्ष कैद

अर्थ चौतारी

२०८१ असार ३, सोमबार

ऋणको आडमा बलात्कार गर्ने माली मानव बेचबिखनमा दोषी ठहर, ...

A A- A+

काठमाडौँ । जिल्ला अदालत ललितपुरले मिटरब्याजी सूर्जमान मालीलाई मानव बेचबिखन तथा ओसारपसार कसुरमा १० वर्ष कैद र ५० हजार जरिवाना हुनेगरी सजाय सुनाएको छ ।ललितपुरकी एक महिलालाई पाँच लाख ऋण दिएको आडमा लगातार बलात्कार र घरजग्गा कब्जा गरेको अभियोगमा उनलाई दोषी ठहर गरेको हो । मालीलाई दोषी ठहर गर्दै आइतबार ललितपुर जिल्ला अदालतकी न्यायाधीश रिताकुमारी बख्रेलको एकल इजलासले यस्तो सजाय सुनाएको हो । न्यायाधीश बख्रेलको एकल इजलासले २०८१ जेठ १३ गते मालीविरुद्ध मानव बेचबिखन तथा ओसारपसार कसुरमा दोषी ठहर गरेको थियो । माली पुर्पक्षका लागि थुनामा थिए । मालीले पीडित महिलालाई पाँच लाख रुपैयाँ क्षतिपूर्ति भराउन समेत भनेको छ । अदालतले महिलालाई यौन शोषण गर्ने मतियार उमेश शाहीको हकमा एक महिना कैद, दुई हजार जरिवाना र पीडितलाई ५० हजार रुपैयाँ क्षतिपूर्ति भराउनुपर्ने फैसला गरेको छ ।पीडित महिलाले मदिराको कुलतमा फसेका श्रीमानको उपचार गर्न आफन्त पर्ने मालीबाट २०७५ सालमा ५ लाख रुपैयाँ ऋण लिएकी थिइन् । सो ऋणको मासिक ब्याज ५० हजार थियो । आयआर्जन नभएकी ऋणी महिलाले ऋणसापट गरेर मासिक ५० हजार रुपैयाँका दरले दुईपटक ब्याज तिरिन् । तर उनले ऋण तिर्न नसकेपछि मालीले बलात्कार गरेको र अरुलाई पनि बलात्कार गर्न लगाउने गरेको बताइएको छ । उनीविरुद्ध जबरजस्ती करणीका लागि हदम्याद नभएपछि मानव बेचबिखनमा मुद्दा दायर गरिएको थियो । शारीरिक बन्धक बनाएर यौन शोषण गर्दै मानव बेचबिखन गरेको अभियोगपत्रमा उल्लेख छ ।