१६ पाकिस्तानी युट्युब च्यानलमाथि भारतले लगायो प्रतिबन्ध

अर्थ चौतारी

२०८२ बैशाख १५, सोमबार

१६ पाकिस्तानी युट्युब च्यानलमाथि भारतले लगायो प्रतिबन्ध

A A- A+

एजेन्सी। भारत सरकारले सोमबार १६ वटा पाकिस्तानी युट्युब च्यानलहरूमाथि प्रतिबन्ध लगाएको छ। प्रतिबन्धित च्यानलहरूमा डन न्यूज, समा टिभी र जियो न्यूज जस्ता चर्चित पाकिस्तानी मिडिया संस्थाहरू पनि परेका छन्।

सरकारको भनाइ अनुसार, ती च्यानलहरूले भारतको सार्वभौमिकता, राष्ट्रिय सुरक्षा तथा सुरक्षा एजेन्सीहरू विरुद्ध लगातार झूटा र भ्रामक समाचारहरू प्रसारण गर्दै आएका थिए। गृह मन्त्रालयको सिफारिसमा सूचना तथा प्रसारण मन्त्रालयले यो कारबाही अघि बढाएको हो।

प्रतिबन्धित च्यानलहरूले भारतमा धार्मिक विद्वेष फैलाउने, साम्प्रदायिक तनाव बढाउने र जनतालाई भ्रममा पार्ने उद्देश्यले सामग्री उत्पादन गर्दै आएको आरोप लागेको छ।

यसैबीच, जम्मू कश्मीर प्रहरीले पीओके (पाक-अधिकृत कश्मीर) बाट सञ्चालित भइरहेका आतङ्ककारी समूहहरूसँग सम्बन्धित भन्दै १५ स्थानमा छापा मारेको छ। यो छापा हालैको पहलगाम आक्रमणसँग सम्बन्धित आतङ्ककारीहरूको सम्भावित लुक्ने ठाउँमा गरिएको हो।

आइतबार राति र सोमबार बिहान नियन्त्रण रेखामा पाकिस्तानी सेनाले गोलीबारी गरेपछि भारतीय सेनाले पनि जवाफ दिएको भारतीय सञ्चार माध्यमहरूले जनाएका छन्। यस घटनाले भारत–पाकिस्तानबीचको सम्बन्ध थप तनावग्रस्त बनाएको देखिन्छ।