‘गोर्खा वारियर’ कोरियामा कोरियन भाषामै चल्ने

अर्थ चौतारी

२०८१ श्रावण १, मंगलवार

‘गोर्खा वारियर’ कोरियामा कोरियन भाषामै चल्ने

A A- A+

काठमाडौँ । नेपालमा गत ११ फागुनमा प्रदर्शन आएको फिल्म ‘गोर्खा वारियर’ अब कोरियामा पनि रिलिज हुने भएको छ । चलचित्रलाई कोरियन रिलिजका लागि कोरियन भाषामा तयार गरिएको हो । चलचित्रलाई कोरियाको लागि कोरियन कम्पनी मुभमेन्ट पिक्चर कर्पले प्रदर्शन जिम्मा लिएसँगै कोरियन भाषामा पनि तयार गरिएको हो । फिल्मका निर्देशक मिलन चाम्स हुन् ।

चलचित्रलाई कोरियाको लागि ७ वर्षको प्रदर्शन तथा वितरण अधिकार कोरियन कम्पनी मुभमेन्ट पिक्चर कर्पले किनेको निर्देशक चाम्सले बताए । ‘गोर्खा वारियरलाई पूर्ण रूपमा कोरियन भाषामै स्वराँकन सहित तयार गरेर यसको रिलिजको लागि सो कम्पनीले हिजो कोरियन भाषामै फस्ट लुक्स पोष्टर पनि बनाएर सार्वजनिक गरेको छ’, चाम्सले भने ‘गोर्खा वारियरलाई कोरियाको सिनेमा हलपछि त्यहाँको टेलिभिजन च्यानलहरुमा पनि रिलिज गरिने छ ।’ नेपाली चलचित्र पहिलो पटक कोरियन भाषामा स्वराँकन गरेर तयार गरिएको उनले दाबी गरे ।

सन् १९४९ मा मलाया जङ्गलमा बेलायती सेनामा आबद्ध गोर्खा सैनिकले लडेको लडाइँको कथा प्रस्तुत गरिएको यो चलचित्रमा रितेश चाम्स, रेविका गुरुङ, विजय लामा, रियर राई, शिशिर बाङ्देल, कविता आले, विरुप घले, सारा राई, सुरज तमु, त्रिचु राई, दिग्गज खत्री, सिद्धार्थ सिंह, सरोज खालिङलगायतको मुख्य भूमिका छ ।

गोर्खा वारियरको निर्मातामा सुमन राई, सुस्मिता वाइवा हुन् । प्रशान्त थापा, राजेन्द्र घिमिरे कार्यकारी निर्माता रहेको चलचित्रको सहनिर्मातामा सुरेश राई रहेका छन् । चलचित्र लन्डन सिनेआई प्रोडक्सनको प्रस्तुति र चाम्स इन्टरटेनमेन्टको सहकार्यमा निर्माण भएको हो ।