देउवा भन्छन् : जनआन्दोलन थोरै लम्बिएको भए ज्ञानेन्द्र देश छाड्थे, तर कांग्रेसको सदाशयताले उनलाई बस्न दिइयो

अर्थ चौतारी

२०८२ जेष्ठ १९, सोमबार

देउवा भन्छन् : जनआन्दोलन थोरै लम्बिएको भए ज्ञानेन्द्र देश ...

A A- A+

काठमाडौँ। आफूहरूको सदाशयताले मात्रै पूर्वराजा ज्ञानेन्द्रले देशमा बस्न पाएको नेपाली कांग्रेसका सभापति शेरबहादुर देउवाले टिप्पणी गरेका छन् । सोमबार बूढानीलकण्ठस्थित निवासमा बसेको पदाधिकारी र पूर्वपदाधिकारीको बैठकमा देउवाले २०६२/६३ को जनआन्दोलनको उत्कर्ष सम्झिँदै यस्तो बताएका हुन् ।

‘दोस्रो जनआन्दोलन केही दिन मात्रै निरन्तर चलेको भए पूर्वराजा ज्ञानेन्द्र देश नै छोडेर भाग्नुपर्थ्यो । तर हामीले सदाशयता देखायौं,’ देउवाको भनाइ उद्धृत गर्दै कांग्रेसका एक पदाधिकारीले भने, ‘अहिले फेरि ज्ञानेन्द्र नारायणहिटीमा पस्न खोज्दैछन् । त्यो कुनै हालतमा सम्भव छैन । संविधानले पनि चिन्दैन । फेरि लोभ गर्न थाले भने राम्रो हुँदैन ।’

राजावादीलाई शान्तिपूर्ण प्रदर्शनको अधिकार रहेको भन्दै देउवाले संविधान र व्यवस्था मास्ने कुरा उचित नभएको बताएका थिए । अहिलेको भन्दा उन्नत व्यवस्था अर्को नभएको भन्दै देउवाले गणतन्त्रको पक्षमा काठमाडौं र प्रमुख शहरमा जागरणसभाका कार्यक्रम गरेर जानुपर्ने बताएका थिए ।