सत्ति भन्सारद्वारा नौ करोड राजश्व सङ्कलन

अर्थ चौतारी

२०८१ असार १६, आईतवार

सत्ति भन्सारद्वारा नौ करोड राजश्व सङ्कलन

A A- A+

लम्की– कैलालीको सत्ति भन्सार कार्यालयले चालु आर्थिक वर्ष २०८०/८१ को ११ महिनामा नौ करोड ८० लाख ७८ हजार रुपैयाँ राजश्व सङ्कलन गरेको छ ।सत्ति भन्सार कार्यालयले चालु आवमा १२ करोड एक लाख ४७ हजार रुपैयाँ राजश्व सङ्कलन गर्ने लक्ष्य लिएको थियो । अबको १५ दिनमा उक्त लक्ष्यमा पुग्न मुश्कील हुने देखिन्छ । गत वर्षको तुलनामा यस वर्ष राजश्व बढ्ने सत्ति भन्सार कार्यालयका प्रमुख दिनहरि सापकोटाले बताए ।गत आर्थिक वर्षमा सो भन्सार कार्यालयले १६ करोड ९४ लाख ४१ हजार रुपैयाँ राजश्व सङ्कलन गर्ने लक्ष्य लिएको थियो । तर सो आवमा सात करोड ५० लाख ४० हजार रुपैयाँ मात्र राजश्व सङ्कलन भएको प्रमुख सापकोटाले बताए । ‘यस वर्ष हामी लक्ष्य प्राप्तिको नजिक पुगेका छौँ’, उनले भने ।सत्ति भन्सार कार्यालयले प्रशासनिक सेवा शुल्कबापत ६४ हजार रुपैयाँ, बेरुजुबाट एक लाख रुपैयाँ, एकलौटी फार्म तथा व्यक्तिगत आयमा लाग्ने करतर्फ ४१ हजार रुपैयाँ, अन्तःशुल्क आयातमा २३ लाख ११ हजार रुपैयाँ, भन्सार महसुल आयातमा पाँच करोड एक लाख रुपैयाँ, कृषि सुधार शुल्कमा एक लाख आठ हजार रुपैयाँ, भन्सार सम्बन्धी अन्य आयमा ६ लाख ३९ हजार रुपैयाँ, मूल्य अभिवृद्धि कर आयातमा चार करोड ४६ लाख ९७ हजार रुपैयाँ तथा हरित करबाट चार हजार रुपैयाँ राजश्व सङ्कलन भएको प्रमुख सापकोटाले बताए ।सत्ति भन्सार भएर आयातको तुलनामा निर्यात शून्य रहेको छ । यस बाहेक जिल्लामा धनगढीस्थित त्रिनगर भन्सार कार्यालय रहेको छ । सो भन्सार भएर खाद्यान्न, लत्ताकपडा, दैनिक उपभोग्य सामग्री तेकुनियाँ भएर आयात गरिँदै आएको छ ।खुला सीमाका कारण राजश्व सङ्कलनमा समस्या भएको प्रमुख सापकोटाको भनाइ छ ।