आईसीसीको अध्यक्ष बन्न बीसीसीआईको सचिव पद त्याग्ने तयारीमा जय शाह

अर्थ चौतारी

२०८१ असार २५, मंगलवार

आईसीसीको अध्यक्ष बन्न बीसीसीआईको सचिव पद त्याग्ने तयारीमा जय ...

A A- A+

काठमाडौँ । भारतीय क्रिकेट कन्ट्रोल बोर्ड (बीसीसीआई) का सचिव जय शाहले आफ्नो पदबाट राजीनामा दिने बताइएको छ । भारतीय सञ्चारमाध्यमका अनुसार उनी अन्तर्राष्ट्रिय क्रिकेट काउन्सिल (आईसीसी)को अध्यक्ष पदमा चुनाव लड्ने तयारीमा छन् ।आईसीसीको निर्वाचन आगामी नोभेम्बरमा हुने समाचारमा जनाइएको छ । जय शाह र बीसीसीआईले भने आधिकारिक रूपमा यस विषयमा केही बताएका छैनन् । आईसीसीको वार्षिक साधारणसभा यसै महिना श्रीलंकाको कोलम्बोमा हुने भएको छ तर, वार्षिक साधारण सभाको एजेन्डामा अध्यक्ष पदको निर्वाचनलाई भने समेटिएको छैन । यदि जय शाह आईसीसीको अध्यक्षमा निर्वाचित भए भने उनी हालसम्मकै सबैभन्दा कम उमेरका अध्यक्ष बन्नेछन् । हाल न्युजिल्यान्डका ग्रेड बार्कले आईसीसीको अध्यक्ष पदमा आसीन छन् ।जय शाह सन् २००९ देखि भारतीय क्रिकेट राजनीतिमा सक्रिय भएका हुन् । बीसीसीआईको सचिव बन्नुअघि उनी गुजरात क्रिकेट संघको सचिव थिए । उनी सन् २०१५ मा बीसीसीआईमा जोडिएका थिए त्यसको चार वर्षपछि सन् २०१९ मा उनी बीसीसीआईको सचिव बनेका हुन् । उनले आईसीसीको अध्यक्ष पदमा निर्विरोध निर्वाचित हुने तयारी अगाडि बढाएको समाचारमा जनाइएको छ ।